Auraton Ke Kaarname

 Auraton Ke Kaarname

Nabi -E- Kareem ﷺ Ke Ailane Nabuwwat Ke Baad Kafiro Ki Sarkashi Badh Gayi Aur Un Ki Taraf Se Pahunchayi Jane Wali Aziyato Ko Musalmano Ne Bhut Bardasht Kiya.

Jahan Sahaba -e- Kiram Ne In Mazaalim Ke Khilaaf Sabro Istiqamat Ke Jauhar Dikhaye Wahin Sahabiyaat Ne Bhi Aise Sabr Ka Muzahira Kiya Ke Ek Tareekh Raqam Kr Di.

Tareekh In Jur'ato Aur Be Baaki Par Aaj Bhi Hairan Hai.

Wo Ek Khatoon Hi Thi Jinhone Deene Haq Ki Khatir Sab Se Pehle Khoon Ka Nazrana Pesh Kiya.

Khawateen Ne Apne Ghar Baar Lutaye, Khoon Ke Rishton Ko Khushi Khushi Maut Ke Hawale Kar Diya, Apne Bacchon Aur Ahle Khana Ko Apni Nazron Ke Samne Sooli Par Latakte Dekha.

Teeron, Talwaron, Khanjaro Se Lahoo Luhan Kiye Jane Par Bhi Mathe Par Shikan Na Aane Diya,

Apni Aabaii Sar Zameen Chodh Kr Hijrat Farmayi

Sehra, Dhoop, Andhero Mein Bhook Pyaas Ki Shiddat Bardasht Ki,

Apni Jaano Tak Ko Qurban Kar Ke Deen Ki Shakho Ko Istiqamat Ke Awraaq Par Raushan Kiya.

Tareekh Aj Bhi In Ki Qurbaniyo Ki Shahid Hai Ki Hazrat Ayesha Radi Allahu Ta'ala Anha Farmati Hain :

"Yaani Hum Nahi Janti Ke Kisi Muhajira Aurat Ne Imaan Laane Ke Baad Muh Phera Ho"

Ye Woh Paakiza Khatoon Hain Ki Jinhone Deen Ki Paasdari Mein Aham Qirdar Ada Kiya.

Zamana -e- Jahiliyat Mein Aisi Kayi Beja Rasm Wa Riwaaj The Jin Se Muashre Bahut Sangeen Masail Paida Hote The.

Ummahatul Momineen Ne Nabi -E- Kareem ﷺ Ki Taleemat Ke Tahat Apni Hayate Tayyiba Mein Be Shumar Qauli Aur Faili Khidmaat Anjaam Di. Khawateen Ke Masail Wa Muamlaat Hi Nahi Balki Quran Wa Sunnat Ko Mahfooz Karne Aur Amaanatdari Ke Sath In Ko Ummat Tak Muntaqil Karne Mein Bhi Zabardast Fareeza Anjam Diya.

Aur Jab Doosri Sadi Hijri Mein Poore Alame Islam Mein Ahadees Ki Riwaayat Wa Tadween Ka Silsila Shuru Hua To Jin Khawateen Ke Pas Majmoo'e The Un Se Wo Haasil Kiye Gaye. Hadees Ki Tehseel Ke Liye Mardo Mein Muhadiseen Wa Ruwaat Ki Tarah Auraton Ne Bhi Ghar Bar Chodh Kar Door Daraz Mulko Ka Safar Kiya Aur In Auraton Ke Liye Muhadiseen Wa Shiyukh Ki Darsgaho Mein Makhsoos Jaghein Raha Krti Thi Jis Mein Wo Mardon Se Alag Rah Kar Sama' Karti Thi Aur Isi Tarah Inhi Auraton Mein Se Hafizah, Qariyah Aur Ilme Tafseer Waghaira Mein Maharat Rakhti Thi. 

Itna Hi Nahi Balki Maidane Waaz Wa Naseehat Mein Bhi Aurato Ne Bade Kaarname Anjaam Diye.

Neez Rashdo Hidaayat, Tazkiya Nafs, Sha'ir Wa Adab, Khitati Wa Kitabat Wa Insha, Azkaar Ki Taleem Wa Tarbiyat Mein Bhi Bahut Zyaada Numaya Thi Aur Rahi.

Chauthi Sadi Mein Qur'ani Madaris Ka Intizam Hua. Banaat Ul Islam Ki Taraf Se Sab Se Pehla Qur'ani Madarsa Masjide Aqsa Ke Shahar Faas Mein 245 Hijri Mein Qaayim Hua Jo Aaj Bhi Jami'a Quzween Ke Naam Se Maujood Hai Aur Uski Barkat Se Kayi Auratein Uloome Deeniya Ki Taraf Shouq Wa Zouq Ke Sath Mutawajje Huyi Aur Islam Ki Sarbulandi Aur Isha'at e Ilm Mein Khoob Khidmaat Anjaam Di.

Aaj Bhi Khawateen Ko Chahiye Ke Qur'an Ke Buniyadi Uloom Seekhein Kyonki Qur'ani Uloom Seekhna Farz Hai Ke Isi Ke Tahat Jumla Uloom Hai. Mayishat, Science Aur Digar Uloom Jinhein Asri Uloom Kaha Jata Hai In Ka Seekhna Saanvi Haisiyat Rakhta Hai Wo Bhi Kayi Quyudaat Ke Sath Lekin Deeni Uloom Behad Zaroori Hai.

Afsos Hum Is Baat Ka Inkar Nahi Kr Sakte Ke Auratein Maghribi Tehzeeb Ke Rang Me Rangeen Aur Bas Naam Ki Azaadi Ke Nashe Me Choor Hokar Uloome Deeniya Se Koso Door Ho Chuki Hain Aur Jab Almiya Ye Hai To Phir Kaarnamo Par Kahna Mazeed Takleef Ka Sabab Banega. Allaah Ta'ala Imaan Rakhne Waali Auraton Ko Maqsade Zindagi Aur Imaan Ki Chashni Ata Farmaye, Sahabiyaat Ka Faiz In Par Nazil Farmaye.

Dukhtare Millat

Janabe Ghazal Sahiba