PUBG

PUBG

Jawano Ki Mehfil Mein Humesha Kuchh Na Kuchh Charche Mein Rehta Hai, Abhi Ek Mobile Game Hai "PUBG" Jis Ke Pichhe Ghanto Barbaad Kiye Ja Rahe Hain, 

Is Qadr Deewane Hain Is Game Ke, Ke Ghar Mein PUBG, Baahar Mein PUBG, Din Mein PUBG, Raat Mein PUBG! 

Khelte To Hain Hi Aur Jab Dosto Se Mulaqat Karte Hain To Bas Isi Ki Baatein Karte Hain

Jitni Mehnat, Waqt Aur Dimagh Is Khel Mein Kharch Kiya Jaata Hai, Agar Us Ka Aadha Bhi Padhayi Mein Lagaya Jaaye To Bahut Fayeda Hoga, 

Jitni Muhabbat Is Khel Se Hai Agar Utni Muhabbat Kitabo Se Ki Jaaye To Zindagi Sanwar Jaaye

Kayi Aise Hain Ke PUBG Mein Bandooq Mein Goli Bharne Ka Tariqa, Hathyar Badalne Ka Tariqa Aur Faaltu Ke Farzi Dushmano Ko Maarne Ka Tariqa To Maloom Hai Lekin Afsos Ke Islam Ka Bunyadi Aqeeda Nahin Maloom! Namaz Ka Tariqa Nahin Maloom! Wuzu Wa Ghusl Ka Tariqa Nahin Maloom! 

PUBG Game To Aaj Aaya Hai, Is Se Pehle Candy Crush, Mario, Contra, Ludo, Carrom Board Waghaira Ke Majnu Paaye Jaate The Aur Aaj Bhi Hain Yaani Humesha Koi Na Koi Fuzool Kaam Mil Hi Jaata Hai

Naujawan Nasl Ko In Cheezo Mein Mubtala Karne Ke Pichhe Kayi Logon Ka Haath Hai, Ab Kisi Ladke Ke Walid Ko Hi Dekh Lijiye, Wo Khud Be Namazi, Be Ilm Aur Ghafil Hai To Bete Ko "Junaid Wa Shibli" Kaise Banayega

Baap Maa Ko Lagta Hai Ke Beta Naukri Karne Laga Hai Aur Hazaaro Rupay Kama Raha Hai Bas Taraqqi Kaafi Ho Gayi, Ab Shaadi Kar Do Taaqi Is Ke Bachhe Bhi Yahi Taraqqi Ka Manjan Khareedne Ke Liye Nikal Padein

Ye Nahin Dekha Jaata Hai Ke Bete Ke Mobile, Us Ke Computer, Us Ke Facebook Profile, Us Ke WhatsApp Messenger Par Kaun Se Phool Khil Rahe Hain, Ab Ho Sakta Hai Ke Aap Sochein Ke Maa Baap To Bhole Hote Hain, Unhein Kya Maloom Beta Kya Kar Raha Hai? 

Hum Kahenge Ke Maa Baap Bhole Nahin Balki Ghair Zimmedar Hain Aur Bachho Ki Tarbiyat Ke Islami Tariqe Se Be Khabar Hain

Bachho Ko School Ka Raasta Dikhaya, Colleges Ke Chakkar Katwaye Hatta Ke Ek Aadhar Card Ke Liye Line Mein Ghanto Khade Rehna Sikhaya Lekin Madrase Mein Taleem Haasil Karne Ke Naam Par Khamoshi Ikhteyar Ki, Ulama Ki Khidmat Mein Haazir Ho Kar Faiz Haasil Karne Ki Baat Aayi To Kaan Par Joo Tak Na Rengi

Laparwahi Ki Wajah Hai Ke Awlaad Kabhi PUBG Mein Chicken Dinner Kar Rahi Hai To Kabhi Facebook Par Ek Hazaar Followers Jama Karne Ki Khushi Mana Rahi Hai 

Allah Ta'ala Humare Naujawano Ko In Fuzool Cheezo Se Bachaye Aur Aane Waali Naslo Ki Tarbiyat Par Kaam Karne Ki Salahiyat Ata Farmaye 

Abde Mustafa