Ek Riwayat Anek Nasihat

 Ek Riwayat Anek Naseehat

Imaam Suyooti Rahimahullah Likhte Hain :

Hazrat -e- Abul Abbas Mustagfiri Rahimahullah Bayan Karte Hain Ki Mai Talabe Ilm Ke Liye Misr Gaya, Wahan Par Hadees Ke Bahut Bade Aalim Hazrate Abu Haamid Misri Se Hadees -e- Khaalid Bin Waleed Radi'Allahu Ta'Ala Anhu Sunane Ki Darkhwast Ki To Unhone Mujhe Ek Saal Ke Roze Rakhne Ka Hukm Farmaya

Un Ke Is Hukm Par Amal Ke Baad Dobara Haazire Khidmat Hua To Unhone Apni Sanad Se Hadeee - E- Khaalid Bin Waleed Radi'Allahu Ta'Aaa Anhu Sunayi.

Chunanche, Hazrat -E- Saiyyiduna Khalib Bin Waleed Radi'Allahu Ta'Ala Anhu Se Riwayat Hai Ki Ek Aa'rabi Ne Bargaahe Risalat Mein Haziri Di Aur Arz Ki :

Duniya Wa Aakhirat Ke Baare Mein Kuch Poochna Chahta Hoon

Rasool -E- Kareem ﷺ Ne Irshaad Farmaaya : Poocho! Jo Poochna Chahte Ho

Aane Waale Ne Arz Ki : Mai Sab Se Bada Aalim Banna Chahta Hoon.

Kareem Aaqa ﷺ Ne Irshaad Farmaaya : Allaah Se Daro, Sab Se Bade Aalim Ban Jaoge

Arz Ki : Mai Sab Se Zyada Ghani Banna Chahta Hoon

Kareem Aaqa ﷺ Ne Irshaad Farmaaya : Qana'At Ikhtiyar Karo, Ghani Ho Jaoge

Arz Ki : Mai Logon Mein Sab Se Behtar Banna Chahta Hoon

Kareem Aaqa ﷺ Ne Irshaad Farmaaya : Logon Mein Sab Se Behtar Woh Hai Jo Doosron Ko Nafa Pahunchata Ho, Tum Logon Ke Liye Nafa Bakhs Ban Jao

Arz Ki : Mai Chahta Hoon Ki Sab Se Zyada Adal Karne Wala Ban Jaun

Kareem Aaqa ﷺ Ne Irshaad Farmaaya : Jo Apne Liye Pasand Karte Ho Wahi Doosron Ke Liye Bhi Pasand Karo, Sab Se Zyada Aadil Ban Jaoge

Arz Ki : Mai Baargaahe Ilaahi Mein Khaas Maqaam Haasil Karna Chahta Hoon

Kareem Aaqa ﷺ Ne Irshaad Farmaaya : Zikrullaah Ki Kasrat Karo, Allah Ta'Ala Ke Khaas Bande Ban Jaoge

Arz Ki : Accha Aur Nek Banna Chahta Hoon

Kareem Aaqa ﷺ Ne Irshaad Farmaaya : Allaah Ta'Ala Ki Ibaadat Yoon Karo Goya Tum Use Dekh Rahe Ho Aur Agar Tum Use Nahin Dekh Rahe To Woh Tumhein Dekh Hi Raha Hai

Arz Ki : Mai Kaamil Eeman Waala Banna Chahta Hoon

Kareem Aaqa ﷺ Ne Irshaad Farmaaya : Apne Akhlaaq Acche Kar Lo, Kaamil Eeman Waale Ban Jaoge

Arz Ki : (Allaah Ta'Ala Ka) Farman Bardaar Banna Chahta Hoon

Kareem Aaqa ﷺ Ne Irshaad Farmaaya : Allaah Ta'Ala Ke Farayiz Ka Ahtimaam Karo, Us Ke Mutee ( Wa Farman Bardaar) Ban Jaoge

Arz Ki : (Roze Qiyamat) Gunahon Se Paak Ho Kar Allaah Ta'Ala Se Milna Chahta Hoon

Kareem Aaqa ﷺ Ne Irshaad Farmaaya : Gusle Janabat Khoob Acchi Tarah Kiya Karo, Allaah Ta'Ala Se Is Haal Mein Miloge Ki Tum Par Koi Gunaah Na Hoga

Arz Ki : Mai Chahta Hoon Ki Roze Qiyaamat Mera Hashr Noor Mein Ho

Kareem Aaqa ﷺ Ne Irshaad Farmaaya : Kisi Par Zulm Mat Karo, Tumhara Hashr Noor Mein Hoga

Arz Ki : Mai Chahta Hoon Ki Allaah Ta'Ala Mujh Par Raham Farmaaye

Kareem Aaqa ﷺ Ne Irshaad Farmaaya : Apni Jaan Aur Makhlooqe Khuda Par Raham Karo, Allaah Ta'Ala Tum Par Raham Karega

Ek Riwayat Anek Nasihat

Arz Ki : Gunahon Mein Kami Chahta Hoon

Kareem Aaqa ﷺ Ne Irshaad Farmaaya : Istigfaar Karo, Gunaahon Mein Kami Hogi

Arz Ki : Zyada Izzat Waala Banna Chahta Hoon

Kareem Aaqa ﷺ Ne Irshaad Farmaaya : Logon Ke Samne Allaah Ta'Ala Ke Baare Mein Shikwa Wa Shikaayat Mat Karo, Sab Se Zyada Izzatdaar Ban Jaoge

Arz Ki : Rizk Mein Kushaadagi Chahta Hoon.

Kareem Aaqa ﷺ Ne Irshaad Farmaaya : Humesha Ba Wuzoo Raho, Tumhare Rizk Mein Faraakhi Aayegi

Arz Ki : Allaah Ta,'Ala Ki Naaraazi Se Amaan Ka Talabgaar Hoon

Kareem Aaqa ﷺ Ne Irshaad Farmaaya : Kisi Par Gussa Mat Karo, Allaah Ta'Ala Ki Naarazi Se Amaan Paa Jaoge

Arz Ki : Duaaon Ki Qubooliyat Chahta Hoon

Kareem Aaqa ﷺ Ne Irshaad Farmaaya : Haraam Se Bacho, Tumhari Duaayein Qubool Hongi

Arz Ki : Chaahta Hoon Ki Allaah Mujhe Logon Ke Samne Ruswa Na Farmaaye

Kareem Aaqa ﷺ Ne Irshaad Farmaaya : Apni Sharmgaah Ki Hifaazat Karo, Logon Ke Samne Ruswa Nahin Hoge

Arz Ki : Chahta Hoon Ki Allaah Ta'Ala Meri Parda Poshi Farmaaye

Kareem Aaqa ﷺ Ne Irshaad Farmaaya : Apne Musalmaan Bhaiyon Ke Aib Chupaao, Allaah Tumhari Parda Poshi Farmaayega

Arz Ki : Kaun Si Cheez Mere Gunahon Ko Mita Sakti Hai?

Kareem Aaqa ﷺ Ne Irshaad Farmaaya : Aansoo, Aajizi Aur Beemari

Arz Ki : Kaun Si Neki Allaah Ke Nazdeek Sab Se Afzal Hai?

Kareem Aaqa ﷺ Ne Irshaad Farmaaya : Acche Akhlaaq, Tawazo'a, Masayib Par Sabr Aur Taqdeer Par Raazi Rahna

Arz Ki : Sab Se Badi Burayi Kya Hai? Kaun Si Buraayi Allaah Ke Nazdeek Sab Se Badi Hai?

Kareem Aaqa ﷺ Ne Irshaad Farmaaya : Bure Akhlaaq Aur Bukhl

Arz Ki : Allah Ta'Ala Ke Gazab Ko Kya Cheez Thanda Karti Hai?

Kareem Aaqa ﷺ Ne Irshaad Farmaaya : Chupke Chupke Sadqaa Karna Aur Sila Rahmi

Arz Ki : Kaun Si Cheez Dozakh Ki Aag Ko Bujhati Hai?

Kareem Aaqa ﷺ Ne Irshaad Farmaaya : Roza

(جامع الاحادیث، ج19، ص405، ح14922 بہ حوالہ اعرابی کے سوالات اور عربی آقا کے جوابات) 

Is Hadees Ke Raawi Hazrate Sayyiduna Abul Abbas Mustagfiri Rahimahullah Ka Shauke Ilm Dekhiye Ki Aik Hadees Sunne Ke Liye Ek Saal Ke Roze Rakhne Par Taiyaar Ho Gaye

Is Mein Un Ke Liye Dars Hai Jo Fee Zamana Aasani Hone Ke Baawjood Ilme Deen Seekhne Se Jee Churaate Hain

Is Ek Riwaayat Mein Naseehat Ke Kayi Moti Maujood Hain Jin Mein Se Har Ek Mein Duniya Aur Aakhirat Ki Bhalaiyaan Samayi Hui Hain

Abde Mustafa