Imam Abu Talib Makki Alaihi Rahma (M386H) Likhte Hain Ke Pehle Zamane Mein Jab Log Aapas Mein Milte To Ek Dusre Se Puchhte : Kya Haal Chaal Hain? Is Se Muraad Ye Puchhna Hota Ke "Mujahida, Sabr Mein Apne Nafs Ke Mutalliq Aur Iman Wa Ilme Yaqeen Mein Zyadati Ki Haalat Ke Mutalliq Kuchh Bataiye" Basa Awqaat Wo Ye Muraad Lete Ke "Parwardigar -e- Azzawajal Se Apne Muamale Ki Khabar Dijiye" Aur Ye Bhi Bataiye Ke "Dunya Wa Aakhirat Ke Umoor Ki Anjaam Dehi Mein Aap Ki Haalat Kaisi Hai? Un Mein Zyadati Hai Ya Kami?" Is Tarah Wo Apne Dilo Ke Ahwaal Ka Tazkira Karte, Apne Uloom Par Amal Ki Kaifiyaat Bayaan Karte Aur Is Baat Ka Bhi Zikr Karte Ke Allah Ta'ala Ne Unhein Husne Muamala Ki Daulat Ata Farmayi Aur Un Ke Liye Kaise Kaise Mafaheem Ayaan (Zaahir) Kiye,
Is Se Un Ka Maqsood Mahaz Inaam -e- Baari Taala Ko Shumar Karna Aur Us Par Shukr Baja Laana Hota Ke Un Ka Ye Amal Un Ke Liye Maarifat Wa Husne Muamala Mein Zyadati Ka Sabab Ban Jaaye
Aaj Kal Log Ek Dusre Se Mil Kar Haal Chaal Maloom Karte Hain To Un Ki Muraad Umoor -e- Dunya Aur Asbaab -e- Hirs Wa Hawa Ke Mutalliq Puchhna Hota Hai, Is Ke Baad Banda Shikayat Aur Narazi Ka Izhaar Karta Hai Aur Yun Wo Apne Nafs Ke Saath Saath Apni Bad Aamaliya Tak Bhool Jaata Hai
(قوت القلوب، اردو، ج2، ص14، ملخصاً و ملتقطاً)
Ab Maujuda Zamane Mein To Haal Chaal Puchhne Se Yahi Muraad Liya Jaata Hai Ke Kaam Kaisa Chal Raha Hai?, Biwi Bachhe Kaise Hain?, Tijarat Mein Fayeda Hua Ya Nahin?, Naukri Mili Ya Nahin? Ya Phir Gaadi Khareedi Ya Nahin?
Bahut Kam Log Aise Bache Hain Jo Kisi Se Ye Jaanne Ke Liye Haal Chaal Puchhte Ho Ke Tumhare Aur Rab Ke Darmiyan Ka Muamala Kaisa Hai? Uloom Par Amal Mein Kamyaabi Mil Rahi Hai Ya Nahin? Nafs Se Jung Ki Kya Kaifiyat Hai?
Kitna Achha Hota Jo Hum Ek Dusre Se Haal Chaal Sirf Isi Liye Puchhte Taaki Apne Apne Dilo Ke Halaat Ko Bayaan Kar Sakein, Mukhtalif Kaifiyat Par Tabadila -e- Khayaal Kar Sakein Aur Ek Dusre Ke Liye Aakhirat Ki Tayyari Mein Aasani Ki Dua Kar Sakein......., Aye Kaash Aisa Ho......,
Abde Mustafa
Post a Comment
Leave Your Precious Comment Here