Social Media Par Kuchh Tasveerein Ye Keh Kar Share Ki Jaati Hain Ke Ye Qabre Rasool ﷺ Ki Tasveer Hai, Aaj Ek Qabr Ki Tasveer To Kal Dusri Qabr Ki......,
Aisa Karne Waale Shohrat Ke Bhooke Hain Ya Aqeedat Mein Andhe Ho Chuke Hain, Ye To Nahin Kaha Ja Sakta Lekin Hum Ye Zaroor Kehna Chahenge Ke Ye Ek Nihayat Hi Ghair Zimmedarana Kaam Hai
Ye Tasveerein Sahih Kaise Ho Sakti Hain Jab Ke Huzoor ﷺ Ki Qabre Mubarak Tak Jaane Ka Filhaal Koi Raasta Hi Nahin Hai! Is Ki Tafseel Kuchh Yun Hai :
(1) Rasoolullah ﷺ Wa Shaykhain Kareemain Ke Mazaraat Ke Gird Chaar Diwari Hai
(2) Ye Chaar Diwari Bilkul Band Hai, Is Mein Aane Jaane Ka Koi Bhi Raasta Nahin Hai
(3) Is Chaar Diwari Ke Gird Bhi Ek Paanch Kono (5 Corners) Waali Mazboot Diwar Hai Jis Par Chadar Daal Di Gayi Hai
(4) Ye Paanch Kono Waali Diwar Bhi Bilkul Band Hai, Is Mein Bhi Aane Jaane Ka Koi Raasta Nahin Hai
(5) Is Paanch Kono Waali Diwar Ke Bahar Ab Sunehri Jaaliya Hain Jin Ke Andar Parde Lage Hain
(6) Khaas Hujra -e- Mubaraka Aur Paanch Kono Waali Diwar Ke Bilkul Niche Sultan Nooruddin Zangi Alaihi Rahma Ki Banayi Huyi, Seesa Pilayi Mazboot Zameeni Diwar Maujood Hai
(7) Khaas Hujra -e- Mubaraka Aur Paanch Kono Waali Diwar Ke Ayen Upar Sar Sabz Gumbad Mazaraat -e- Salasa Se Barkatein Loot Raha Hai Aur Poore Alam Mein Loota Raha Hai
(8) Ab Koi Bhi Aisa Raasta Nahin Hai Ke Baraah -e- Raast Koi Mazaraat Tak Pahunch Sake Aur Ye Tamam Umoor Pehli Sadi Se Le Kar Zyada Se Zyada Chhati Sadi Tak Mukammal Kar Liye Gaye The
(9) Agar Kisi Baadshah Ya Sadar Ya Phir Kisi Makhsoos Shakhsiyat Ke Liye Darwaza Khola Jaata Hai To Wo Faqat Paanch Kono Waali Deewar Ke Bahar Tak Hi Jaate Hain Na Ke Khaas Mazaraat Tak
(10) Jab Andar Jaane Ka Raasta Tha Us Waqt Ye Camera Ijaad Nahin Hua Tha Aur Jab Camera Aaya To Isse Kaafi Pehle Raasta Band Ho Chuka Tha Lihaza Ye Tasveerein Auliya -e- Kiraam Ki Hain Jinhein Huzoor ﷺ Ki Taraf Mansoob Kiya Jaata Hai
Abde Mustafa
Post a Comment
Leave Your Precious Comment Here