Kya Aisa Nahin Ho Sakta?

Kya Aisa Nahin Ho Sakta? 

Kya Aisa Nahin Ho Sakta Ke Ek Shauhar Apni Biwi Ke Liye "Shareefo Waale" Kapde Khareed Laaye Aur Biwi Use Khushi Khushi Qabool Kar Le? 

Nahin Nahin Bilkul Nahin! Ye Maine Kya Keh Diya! Aisa Kaise Ho Sakta Hai......! 

Biwi Sahiba Ki Pasand Bhi To Koi Cheez Hai,

Shauhar Par To Laazim Hai Ke Ek Din Balki Do Din Aur Agar Na Ho To Teen Din Ka Waqt Nikaal Kar Biwi Ko Poore Bazaar Ghuma Kar Shopping Karwaye Aur Aise Kapde Dilwaye Jo Muhalle Mein Sab Se Alag Ho Taaki Dekhne Waalo Ke Tassuraat (Comments) Ke Izhaar Se Dono Miya Biwi Ko Sukoon Haasil Ho

Ye Bhi Dekhna Zaroori Hai Ke Is Saal Eid Mein "Kya Chal Raha Hai?" (Matlab Kis Ka Trend Hai)

Kahin Aisa Na Ho Ke Hum Purane Version (Model) Ke Kapde Khareed Lein Aur Bazaar Mein Kuchh Aur Chal Raha Ho 

Biwi Sahiba Khud Kapde Ka Color, Design, Quality, Brand Aur Qeemat Waghaira Dekhengi Aur Dukandar Se Khud Mol Tol Bhi Karengi,

Ab Hum Parde Ki Baat Karenge To Ye Tak Kaha Ja Sakta Hai Ke "Niyyat Achhi Honi Chahiye" Lihaza Hum Khamosh Hain Kyunki Shauhar, Biwi, Dukandar Aur Aas Paas Mein Maujood Log, Sab Ki Niyyat Achhi Hai Aur Humari Hi Soch Kharab Hai

Gustakhi Muaaf Karein, Hum Zyada Bol Gaye.......!

Abde Mustafa