Aaghaz Mein Hi Hum Bata Dena Chahte Hain Ke Ye Tariqa Sirf Un Logon Ke Liye Hai Jo Ghair Shadi Shuda (Kunware) Hain
Jin Ki Shadi Ho Chuki Hai, Un Ke Liye Filhaal Humare Paas Aisa Koi Aasan Tariqa Nahin Hai Jis Se Wo Dusri Shadi Kar Sakein Albatta Agar Wo Chahein To Apni Biwi Se Dusri Shadi Ki Ijazat Lene Ki Koshish Kar Sakte Hain Ya Bina Ijazat Liye Bhi Himmat Dikha Sakte Hain Lekin Hum In Dono Mein Se Kisi Ka Mashwara Nahin Denge
Ye Baat To Pakki Hai Ke Shadi Ke Baad Biwi Se Dusre Nikah Ki Ijazat Milna Namumkin Ke Qareeb Hai Aur Agar Bina Ijazat Dusri Biwi Le Aaye To Phir Kya Hoga, Ye Aap Achchi Tarah Samajh Sakte Hain
Jab Ye Maloom Ho Chuka To Ab Kuchh Aisa Karna Hoga Ke Saanp Bhi Mar Jaaye Aur Laathi Bhi Salamat Rahe Yaani Ek Teer Se Do Nishane Aur Aisa Wahi Kar Sakte Hain Jo Kunware Hain
Karna Ye Hai Ke Shadi Tay Hone Se Pehle Ladki Waalo Ke Saamne Kuchh Sharait (Conditions) Rakhni Hain Aur Un Sharait Ke Saath Kuchh Offers Bhi Honge Taaki Tarazu Ka Koi Palda Bhaari Na Ho Jaaye
Sab Se Pehle Offers Ki Fehrist (List) Dekh Lijiye Jo Aap Ko Likh Kar Deni Hai :
(a) Ladki Waalo Se Ek Rupay Bhi Nahin Liya Jayega
(b) Jahez Mein Qeemti Samaan Qabool Nahin Kiye Jayenge
(c) In Ke Ilawa Bhi Kisi Qism Ki Len Den Ki Ijazat Nahin Hai
(d) Baaratiyo Ki Tadaad 10-20 Logon Ke Qareeb Hogi
(e) Gaana Bajana, Naachna, Aatish Baazi Waghaira Par Dono Taraf Se Sakht Pabandi Hogi
In Mein Aap Apne Ilaqe Ke Mutabiq Kami Beshi Kar Sakte Hain, Asal Maqsad Hai Shadi Ko Bilkul Aasan Karna
Agar Dekha Jaaye To Ye Offers Koi Ehsaan Nahin Hai Lekin Aaj Kal Jis Tarah Shadiya Ho Rahi Hain, Ye Offers Ehsaan -e- Azeem Se Kam Bhi Nahin Hain
In Offers Ke Saath Jo Sharait Rakhni Hain Wo Ye Hain :
(a) Ladki Bunyadi Aqaid -o- Masail Ka Ilm Rakhti Ho
(b) Agar Ladka Aage Chal Kar Kisi Bewa Aurat Ya Kisi Ghareeb Gharane Ki Ladki Se Dusri, Teesri Balki Chauthi Shadi Bhi Karta Hai To Is Par Ladki Ya Ladki Ke Ghar Waalo Ko Koi Aitraz Nahin Hona Chahiye
Bas In Do Sharto Par Aap Ko Date Rehna Hai, Pehli Shart Se Fayeda Ye Hoga Ke Ladki Aap Ki Baato Ko Samjhegi Aur Dusri Shart Aap Ke Liye Ek Tarah Se Dusri, Teesri Aur Chauthi Shadi Ka License Hai
Mumkin Hai Ke In Sharait Ke Saath Jaldi Rishta Tay Na Ho Lekin Hoga Zaroor Aur Jab Ho Jayega To Pehli Biwi Aur Us Ke Ghar Waalo Se Ijazat Lene Ka Jo Risky Process Hai Wo Raaste Mein Aayega Hi Nahin
Ab Aap Jab Chahein Dusri, Teesri Aur Chauthi Shadi Kar Sakte Hain, Aap Ko Koi Nahin Rok Sakta
Ye Itna Bhi Aasan Nahin Hoga Lekin Kaafi Had Tak Mufeed Saabit Hoga
Jo Log Chaar Biwiyo Mein Insaf Karne Ke Ahal Hain Wo Zaroor Is Par Amal Karein Aur Ghareeb, Bewa Aurato Ka Ghar Basayein, Unhein Pyaar Dein Aur Sawaab Ke Mustahiq Banein
Abde Mustafa
Post a Comment
Leave Your Precious Comment Here