Agar Aap Kahein To Samundar Mein Kood Padein

 Agar Aap Kahein To Samundar Mein Kood Padein

Maahe Ramazan, Sana 2 Hijri... Ek Lashkar Madine Se Rawana Hua... Lashkar Mein Allah Ke Nabi Sallallaho Ta'ala Alaihi Wasallam Jalwa Farma Hain... Na Zyada Hathyar, Na Zyada Fauji Aur Na Zyada Rashan Hai

Achanak Raste Mein Maloom Hota Hai Ke Dushman Hamla Aawar Hone Waale Hain Aur Ek Badi Jung Saamne Hai

Huzoor Sallallaho Ta'ala Alaihi Wasallam Ne Sahaba Ko Jama Kiya Aur Surate Haal Se Aagah Kiya Ke Mumkin Hai Is Safar Mein Kafiro Se Jung Ki Naubat Aa Jaaye

Sahaba Mein Se Hazrate Siddique -e- Akbar Wa Faruque -e- Aazam Aur Dusre Muhajireen Ne Josho Kharosh Ka Izhaar Kiya Magar Huzoor Sallallaho Ta'ala Alaihi Wasallam Ki Nazrein Ansaar Ke Chehro Par Thi Kyunki Ansar Ne Aap Sallallaho Ta'ala Alaihi Wasallam Se Is Baat Ka Ahad Kiya Tha Ke Wo Us Waqt Talwar Uthayenge Jab Kuffar Madine Par Chadh Aayenge Aur Yahan Madine Se Baahar Nikal Kar Jung Karne Ka Mamla Tha

Ansaar Mein Se Ek Qabile Ke Sardar Hazrate Saad Bin Obada Jo Huzoor Sallallaho Ta'ala Alaihi Wasallam Ki Nazro Ko Dekh Rahe The, Kehne Lage :

Ya Rasoolallah Sallallaho Ta'ala Alaihi Wasallam! Kya Aap Ka Ishara Humari Taraf Hai? Hum Wo Jaanisaar Hain Ke Agar Aap Ka Hukm Ho To Hum Samundar Mein Kood Padein

Phir Ek Aur Qabeele Ke Sardar Hazrate Miqdad Bin Aswad Ne Josh Mein Aa Kar Arz Ki :

Ya Rasoolallah Sallallaho Ta'ala Alaihi Wasallam! Hum Aap Se Wo Nahin Kahenge Jo Hazrate Moosa Alaihissalam Ki Qaum Ne Kaha Tha Ke Aap Aur Aapka Khuda Ja Kar Lade Balki Hum Log Aapke Daayein Se Baayein Se, Aage Se Aur Pichhe Se Ladenge 

Ye Sun Kar Huzoor Sallallaho Ta'ala Alaihi Wasallam Ka Chehra Chamak Utha Phir Jo Jung Huyi Use Junge Badr Kaha Jaata Hai, Kafiro Ko Moonh Ki Khaani Padi Aur Musalmano Ko Allah Ta'ala Ne Fatah Ata Farmayi

(سیرت مصطفی، علامہ عبد المصطفی اعظمی) 

Abde Mustafa