Marne Wala Pehla Kafir

 Marne Wala Pehla Kafir 

Maahe Rajab Sana 2 Hijri Me Humare Nabi Sallallaho Ta'ala Alaihi Wasallam Ne Hazrate Abdullah Bin Jahash Ko Ameere Lashkar Bana Kar Un Ki Matahti Mein Aath Ya Barah Muhajireen Ka Ek Juth Rawana Farmaya, Do Do Aadmi Ek Ek Oont Par Suwaar The

Huzoor Sallallaho Ta'ala Alaihi Wasallam Ne Hazrate Abdullah Bin Jahash Ko Ek Lifafe Me Ek Mohar Band Khat Diya Aur Farmaya Ki Do Din Safar Karne Ke Baad Is Lifafe Ko Khol Kar Padhna Aur Is Me Jo Hidayaat Likhi Huyi Hai Un Par Amal Karna

Jab Khat Khol Kar Padha To Us Me Yeh Darj Tha Ki Tum Taayif Aur Makke Ke Darmiyaan Maqame "Nakhla" Me Thehar Kar Quraish Ke Kaafilo Par Nazar Rakho Aur Surate Haal Ki Humein Barabar Khabar Dete Raho

Yeh Bada Hi Khatarnak Kaam Tha Kyun Ki Dushmano Ke Ayen Markaz Main Qiyaam Kar Ke Jasoosi Karna Goya Maut Ke Moonh Me Jaana Tha Magar Yeh Sab Jaa Nisaar Be Dhadak Maqame "Nakhla" Pahunch Gaye

Ajeeb Ittefaq Hai Ki Rajab Ki Aakhri Taarikh Ko Ye Log Nakhla Main Pahunche Aur Isi Din Kuffare Quraish Ka Ek Tijarati Qafila Aaya Jis Me Amr Bin Al Hazrami Aur Abdullah Bin Mugeera Ke Do Ladke Usmaan Wa Naufal Aur Hakam Bin Kaisan Wagairah The Aur Oonto Par Khajoor Aur Dusra Maale Tijarat Ladaa Hua Tha

Hazrate Abdullah Bin Jahash Ne Apne Sathiyo Se Farmaya Agar Hum In Qafile Waalo Ko Chhod De To Yeh Log Makkah Pahunch Kar Hum Logon Ki Yahan Maujoodgi Se Makkah Walo Ko Ba Khabar Kar Denge Aur Hum Logon Ko Qatl Ya Giriftaar Kara Denge Aur Agar Hum In Logon Se Jung Karein To Aaj Rajjab Ki Aakhiri Taarikh Hai Lihaaza Shehre Haram (Hurmat Ke Mahine) Main Jung Karne Ka Gunaah Hum Par Laazim Hoga

Aakhir Yehi Raay Qarar Paayi Ki In Logon Se Jung Kar ke Apni Jaan Ke Khatre Ko Dafa'a Karna Chahiye

Chunanche Hazrate Waqid Bin Abdullah Tamimi Ne Ek Aisa Taak Kar Teer Mara Ki Woh Amr Bin Al Hazrami Ko Laga Aur Woh Usi Teer Se Qatl Ho Gaya Aur Usman Wa Hakam Ko In Logon Ne Giriftaar Kar Liya, Naufal Bhaag Nikla, Hazrat Abdullah Bin Jahash Oonto Par Lade Huye Maal wa Asbaab Ko Maale Ganimat Bana Kar Laut Aaye Aur Huzoor Sallallaho Ta'ala Alaihi Wasallam Ki Khidmat Mein Is Maale Ganimat Ka Paanchva Hissa Pesh Kiya

(زرقانی علی المواہب، ج1، ص398)

Jo Log Qatl Ya Giriftaar Huye Woh Bahut Hi Muazzaz Khandan Ke Log The

Amr Bin Al Hazrami Pahla Kaafir Tha Jo Musalmano Ke Hath Se Maara Gaya

Jo Log Giriftaar Huye Yaani Usman Aur Hakam, In Mein Se Usman To Mugeera Ka Pota Tha Jo Quraish Ka Ek Bahut Bada Raees Shumaar Kiya Jata Tha Aur Hakam Bin Kaisan Hisham Bin Al Mugeera Ka Aazaad Karda Ghulam Tha, Is Bina Par Is Waqiye Ne Tamam Kuffare Quraish Ko Gaizo Gazab Ne Aag Bagula Bana Diya Aur "Khoon Ka Badla Khoon" Lene Ka Naara Makkah Ke Har Koocha Aur Bazaar Mein Gunjne Laga Aur Dar Haqiqat Junge Badr Ka Ma'arika Isi Waqiye Ka Radde Amal Hai Chunache Hazrate Urvah Bin Zubair Ka Bayaan Hai Ki Junge Badr Aur Tamam Ladaiyan Jo Kuffare Quraish Se Huyi Un Sab Ka Buniyaadi Sabab Amr Bin Al Hazrami Ka Qatl Hai Jis Ko Hazrate Waqid Bin Abdullah Tamimi Ne Teer Maar Kar Qatl Kar Diya Tha

(تاریخ طبری ص1284)

(سیرت‌مصطفی، ص208، 209)

Abde Mustafa