Akele Zindagi Ka Safar

 Akele Zindagi Ka Safar

Huzoor Nabiye Kareem Sallallaho Ta'ala Alaihi Wasallam Ne Irshad Farmaya Ke Agar Log Tanha Safar Karne Ke Us Nuqsan Ko Jaan Lete Jise Main Jaanta Hoon To Koi Sawaar Raat Ko Tanha Safar Na Karta

(Bukhari, 2998)

Yahan Sawaar Ko Tanha Safar Se Mana Kiya Gaya Hai To Ek Sawal Ye Hai Ke Kya Jo Paidal Ho Wo Safar Kar Sakta Hai? 

Ulama Likhte Hain Ke Jo Paidal Ho Uske Liye To Zyada Mana Hoga Ke Akela Safar Kare Kyunki Sawaar Ko Sawari (Ke Jaanwar) Se Uns (Muhabbat, Raahat) Haasil Hota Hai Aur Paidal Uns Se Khaali Hota Hai

Ye To Raat Ka Safar Hai Ke Akele Karna Achha Nahin Phir Zindagi Ka Safar Jis Mein Tareekiyo Se Bhare Raste Hain, In Ko Akele Paar Karna Kis Tarah Munasib Ho Sakta Hai

Akela Insan Akela Hi Hota Hai, Agar Ek Hamsafar Ho To Raaste Aasan Ho Jaate Hain

Ulama Likhte Hain Ke Akele Paidal Safar Karne Waala Agar Raaste Mein So Jaaye To Us Ko Jagane Waala Koi Nahin Hoga Aur Agar Us Par Koi Museebat Aa Jaaye To Madad Karne Waala Koi Nahin Hoga

(Dekhiye Neamul Baari Sharah Sahih Bukhari) 

Khaas Logon Ki Baat To Juda Hai Ke Wo Tanha Nahin Hote, Unhein Allah Ka Qurb Haasil Hota Hai Jaisa Ke Huzoor Ne Safar Ki Dua Farmayi Ke Aye Allah Safar Mein Tu Mera Saathi Hai

(Muslim) 

Aam Logon Ko Har Safar Mein Hamsafar Ki Zaroorat Hai, 

Imano Aqeede Ke Liye Saliheen Ka Saath Chahiye, 

Ek Bachhe Ko Walidain Ka Saath Chahiye, 

Parwaan Chadhne Ke Liye Achhi Sohbat Chahiye, 

Ek Mard Ko Ek Aurat Ke Saath Ki Zaroorat Hai, 

Ek Aurat Ko Ek Mard Ba Taure Hamsafar Chahiye, 

Kabhi Ek Dost To Kabhi Ek Dushman Ki Shakl Mein Bhi Hamsafar Ki Zaroorat Hoti Hai

Allah Ta'ala Humare Liye Is Zindagi Ke Safar Ko Aasan Farmaye

Abde Mustafa