Kya Shadi Ke Baad Aurat Ke Deen Seekhne Ka Waqt Khatm?

 Kya Shadi Ke Baad Aurat Ke Deen Seekhne Ka Waqt Khatm?

Agar Aap Aisa Sochte Hain Ke Ek Aurat Shadi Kar Ke Majboor Ho Jaati Hai Aur Phir Ilm Haasil Karne Aur Deen Seekhne Ka Silsila Rok Dena Chahiye To Ye Hargiz Sahih Nahin

Agar Shadi Se Pehle Ladki Ke Ghar Waalo Ne Deeni Mahaul Se Door Hone Ki Wajah Se Use Ilme Deen Nahin Padhaya To Ab Shadi Ke Baad Bhi Agar Ladki Ko Ehsaas Hota Hai To Mahaz Ye Soch Kar Ruk Jaana Ke Ab Meri Shadi Ho Gayi Aur Bas Khana Pakana, Kapde Dhona Aur Bachho Ki Dekh Bhaal Hi Meri Aakhiri Zimmedari Hai To Ye Durust Nahin

Use Chahiye Ke Shadi Ko Majboori Nahin Balki Apne Haq Mein Behtar Jaane

Uska Shauhar Uski Kamzori Nahin Balki Uska Hamsafar Aur Uski Taaqat Hai Aur Asal Safar To Nikah Ke Baad Hi Shuru Hota Hai Ke Ek Dusre Ko Sambhalne Ke Liye Har Waqt Koi Maujood Hota Hai

Aurat Ko Chahiye Ke Shauhar Se Ilme Deen Haasil Kare, Use Jahan Dusre Kaamo Ke Liye Raazi Kar Leti Hain To Is Par Bhi Raazi Karein Taaki Aakhirat Ki Kamyaabi Saath Mil Kar Paa Sakein

Agar Shauhar Padha Likha Deendar Ho To Use Chahiye Ke Jis Aurat Se Nikah Kiya Hai Use Raahe Khuda Ka Musafir Banaye Aur Itna Ilm Zaroor De Ke Wo Is Raah Se Bhatak Na Sake

Aurat Agar Mard Ko Deendar Na Paaye To Use Deendari Ki Taraf Bulaye Aur Mard Kaunsi Raah Par Jaata Hai, Is Mein Aurat Ka Aham Kirdaar Hota Hai Lihaza Aurat Ko Apna Kirdaar Achhe Se Nibhana Chahiye 

Shadi Ke Baad Bhi Ye Jaan Lein Ke Allah Ta'ala Aur Uske Rasool Ke Ahkaam Aap Par Jaari Hote Hain Aur Ek Din Aapko Hisaab Ke Liye Haazir Hona Hai Phir Kaise Kaha Ja Sakta Hai Ke Ab Ilm Haasil Karne Ya Deen Seekhne Ki Umr Na Rahi? 

Allah Ta'ala Aurato Ko Taufiq Se Nawaze Ke Wo Ilme Deen Ki Taraf Raghib Ho Jaayein Aur Saath Mein Apne Shauhar Aur Bachho Ko Bhi Is Janib Laayein Taaki Asal Kamyaabi Haasil Kar Sakein

Abde Mustafa