Ye Ishq Hi Hai

 Ye Ishq Hi Hai

Maulana Roomi Farmate Hain Ke Ek Mazdoor Din Bhar Apni Kamar Par Bojh Utha Kar Kaam Karta Hai Aur Ek Lohaar Apni Bhatti Mein Sar Moonh Kaala Karne Ke Baad Nihayat Khushi Se Ghar Waapas Aata Hai Taaki Apni Ghar Ki Mehbooba (Apni Biwi) Ko Khush Kare Aur Samaan -e- Hayaat Muhayya Kar Sake 

Ye Karobaar -e- Hayaat Jo Subah Se Shaam Tak Chalta Hai, Is Mein Yahi Ishq Ka Jazba Kaar Farma Nazar Aata Hai Warna Kaun Hai Jo Kisi Ki Khatir Apne Aap Ko Pareshani Aur Musibat Mein Daale 

Ye Sab Ishq Ki Badaulat Hai

Ishq Ek Roohani Cheez Hai Aur Ye Aisi Jins Nahin Ke Jisko Bazaar Se Khareed Liya Jaaye

Maulana Farmate Hain Ke Maalo Daulat Aur Dunya Ki Cheezein Sab Murda Hain, Magar In Sab Ke Husool Ki Koshish Zinda Logon Ke Liye Hoti Hai 

(سوز و ساز رومی) 

Jis Gharane Mein Muhabbat Ka Jaadu Chalta Hai Uske Rehne Waale Jannate Firdaus Ki Si Zindagi Guzarte Hain Aur Kam Aamadni Mein Khusho Khurram Rehte Hain

Ye Ishq Ki Barkat Hai Ke Maalo Daulat Se Jo Cheez Khareedi Nahin Ja Sakti, Use Paate Hain

Agar Ishq Ho Jo Shehwat Parasti Se Juda Ho To Phir Ishq Kam Nahin Hota Balki Badhta Jaata Hai Aur Ye Ek Aisa Rishta Hai Jo Maalo Daulat Se Baala Tar Hai

Ise Agar Hum Maalo Daulat Ke Tarazu Mein Laate Hain To Asal Lazzat Baaqi Nahin Rahegi

Allah Ta'ala Se Dua Hai Ke Humein Raahe Ishq Ka Musafir Banaye Ke Jis Raah Mein Har Past Ka Buland, Talkh Ka Sheereen Aur Nakaam Ka Kamyaab Banna Koi Badi Baat Nahin  

Abde Mustafa