Ye Bayaan Karte Huye Bhi Takleef Hoti Hai Ke Kuchh Logon Ne Naat -e- Rasool Jaisi Muqaddas Shay Ko Bhi Khel Kood Aur Nachne Gaane Ka Zariya Bana Liya Hai!
Ek Aisi Bala Humare Muashre Mein Utri Hai Jis Ki Jitni Mazammat Ki Jaaye Kam Hai
Hum Baat Kar Rahe Hain "Remix Naat" Ki, Is Mein Hota Ye Hai Ke Asal Naat Ko Kuchh Softwares Ke Zariye Remix Kiya Jaata Hai Yaani Is Mein Jadeed Mazameer (Musical Instruments) Ki Aawaz Ko Milaya Jaata Hai Jis Tarah Filmi Gaano Mein Mazameer Ki Awaazein Hoti Hain
Ye Awaazein (Sounds) Kayi Tarah Ki Hoti Hain Jinhein Nikalne Ke Liye Kisi Dhol Ko Bajane Ya Bansuri Mein Phoonkne Ki Zaroorat Nahin Hoti Balki Ye Softwares Ke Zariye Banayi Jaati Hain
Dhamak Ki Awaaz Jise "Beat" Kaha Jaata Hai Us Ke Saath Kayi Tarah Ki Awaazein Mila Kar Naat Ko Aisi Shakl Di Jaati Hai Ke Sunne Se Filmi Gaana Maloom Hota Hai
Wo Muqaddas Ash'aar Jin Mein Allah Ke Pyaare Rasool ﷺ Ki Tareef -o- Tauseef Bayaan Ki Jaati Hain Un Ko Gaane Ki Tarah Remix Banana Aur Phir Use Buland Awaaz Se Juloos Wa Mahafil Mein Bajana Ishq -e- Rasool Hai Ya Tauheen?
Ek Aam Insan Bhi Ghaur Kare To Use Maloom Ho Jayega Ke Ye Kitni Ghatya Harkat Hai,
Is Bala Mein Ek Achhi Khaasi Tadaad Mubtala Hai!
Pehle Se Hi Filmi Gaano Ka Bhoot Bachpan Se Pachpan Ke Saro Par Sawaar Hai, Ye Kya Kam Tha Jo Naat -e- Rasool Ki Izzat Ko Pamaal Karne Par Utar Aaye!
Hum Aap Se Guzarish Karte Hain Ke Lillah Is Se Tauba Karein Aur Remix Naat Ka Boycott Karein
Abde Mustafa
Post a Comment
Leave Your Precious Comment Here