Hazrate Shaykh Abdul Azeez Dabbagh Rahimahullahu Ta'ala Ke Shagird Hazrate Allama Ahmad Bin Mubarak Alaihi Rahma Farmate Hain Ke Ek Din Main Apne Ustaade Muhtaram Ke Saath Mehwe Kalaam Tha
Maine Aap Rahimahullah Ke Saamne Hazrate Suleman Alaihissalam Ka Tazkira Kiya Ke Allah Ta'ala Ne Un Ke Liye Kis Tarah Jinno Ins, Shayateen Aur Hawa Ko Musakhhar Kar Diya Tha!
Maine Ye Bhi Zikr Kiya Ke Hazrate Dawood Alaihissalam Ko Ye Moajiza Ata Kiya Gaya Tha Ke Loha Un Ke Haath Mein Aa Kar Aate Ki Tikiya Ki Tarah Narm Ho Jaata!
(Phir Maine Kaha Ke) Hazrate Eisa Alaihissalam Ko Kodhiyo Ko Tandrust Karne, Maadar Zaad Andho Ko Beena Karne Aur Murdo Ko Zinda Karne Ka Moajiza Ata Farmaya Tha!
Meri Is Guftagu Se Aap Rahimahullah Ne Samjha Ke Shayad Main Ye Keh Raha Hoon Ke Jab Huzoor ﷺ Sayyidul Khalq Hain Aur Tamam Ambiya Se Afzal Hain To Phir Aap ﷺ Se Is Tarah Ke Moajizaat Kyun Runuma Nahin Huye Aur Jo Moajizaat Aap Se Runuma Huye Un Ka Andaaz Judagana Hai
Is Ke Baad Ustaade Muhtaram Ne Farmaya Ke Wo Tamam Badshahi Jo Allah Rabbul Izzat Ne Hazrate Suleman Alaihissalam Ko Ata Farmayi Thi, Hazrate Dawood Alaihissalam Ke Daste Aqdas Mein Lohe Ko Narm Kar Diya Tha Aur Jin Inayaat Se Allah Ta'ala Ne Hazrate Eisa Alaihissalam Ko Nawaza Tha, Allah Rabbul Izzat Ne Ye Sab Kuchh Balki Is Se Bahut Zyada Aap ﷺ Ki Ummat Ke Auliya -e- Kamileen Ko Ata Kiya Hai!
Allah Ta'ala Ne Auliya Ke Liye Jinno Ins, Shayateen, Hawa Aur Malaika Balki Tamam Aalam Ko Musakhhar Kar Diya Hai
Allah Ne In Ko Qudrat Bakhshi Hai Wo Maadar Zaad Andho Ko Beena Kar Dete Hain, Apahijo Ko Sihhat Ata Karte Hain, Murdo Ko Zinda Karte Hain Lekin Ye Wo Poshida Amr Hai Jo Makhlooq Ke Liye Zaahir Nahin Kiya Jaata Taaki Log Un Ki Taraf Hama Tan Maayil Ho Kar Apne Allah Ko Bhool Na Jaayein
Auliya -e- Kiraam Ko Ye Qudrat Wa Tawanayi Tajdaar -e- Madina ﷺ Ki Barkat Se Haasil Huyi Hai, Ye Sab Aap ﷺ Ke Moajizaat Hi Hain
(الابریز)
Abde Mustafa
Post a Comment
Leave Your Precious Comment Here