رشتہ جوڑ دیں یا پھر توڑ دیں؟ ‏

رشتہ جوڑ دیں یا پھر توڑ دیں؟ 

ارشادِ باری تعالی ہے:

 وَ یَقْطَعُوْنَ مَاۤ اَمَرَ اللّٰهُ بِهٖۤ اَنْ یُّوْصَلَ وَ یُفْسِدُوْنَ فِی الْاَرْضِۙ اُولٰٓىٕكَ لَهُمُ اللَّعْنَةُ وَ لَهُمْ سُوْٓءُ الدَّارِ (الرعد:25)

"اور جسے جوڑنے کا اللہ نے حکم فرمایا ہے اسے کاٹتے ہیں اور زمین میں فساد پھیلاتے ہیں ان کے لیے لعنت ہی ہے اور اُن کے لیے برا گھر ہے" 

 رسول اللہ ﷺ نے فرمایا :

جس گناہ کی سزا دنیا میں بھی جلد ہی دے دی جائے اور اس کے لیے آخرت میں بھی عذاب رہے وہ بغاوت اور قَطع رَحمی سے بڑھ کر نہیں۔ (یعنی یہ گناہ یہاں اور آخرت دونوں میں عذاب کا سامان ہے) 

( ترمذی، کتاب صفۃ القیامۃ، ۴/ ۲۲۹، الحدیث: ۲۵۱۹) 

یعنی کہ ایسے کتنے لوگ ہیں جو رشتوں میں درار پیدا کرنے کی کوشش کرتے ہیں اور کچھ ایسے ہیں جو آپسی رشتے داروں میں ایسے مشورے پیش کرتے رہتے ہیں جن سے ایک اچھا کام بنتے بنتے رک جاتا ہے۔ وہ اس بات کا تھوڑا بھی خیال نہیں کرتے کہ ان کے مشورے اصلاح کے نام پر رشتے جوڑنے کا نہیں توڑنے کا کام کر رہے ہیں۔

دوسرے وہ ہیں جو ان کی باتوں کو پتھر کی لکیر سمجھ کر رشتوں کو جوڑنے والے عمل سے دوری اختیار کر لیتے ہیں۔

حکیم الاُمت حضرت علامہ مفتی احمد یار خان نعیمی رحمہ اللہ تعالی ایک حدیث کے تحت فرماتے ہیں کہ مسلمانوں سے اچھا گمان کرنا اُن پر بدگمانی نہ کرنا یہ بھی اچھی عبادات میں سے ایک عبادت ہے۔

(مرآۃ المناجیح، ٦٢١/٦)

ایک مرتبہ حضرت ابو ہریرہ رضی اللہ تعالی عنہُ احادیث مبارکہ بیان کر رہے تھے تو فرمایا : 

وہ شخص جو رشتے داری توڑنے والا ہو وہ ہماری محفل سے اُٹھ جائے! 

ایک نوجوان اُٹھ کر اپنی پھوپی کے ہاں گیا کئی سال پرانا جھگڑا ختم کیا اور پھوپی کو راضی کرلیا۔

(الزواجر، قطع الرحم، ١٥٣/٢)

رشتے داری ایک بہت پیارا احساس ہے جسے محسوس کرنے کی ضرورت ہے۔ ذرا ذرا سی باتوں پر رشتے کی ڈور توڑ دینا درست نہیں ہے۔ اس سے جہاں اتحاد پر فرق پڑتا ہے وہیں کئی دل بھی ٹوٹتے ہیں جو کہ بہت بری بات ہے۔ رشتے کیجیے، رشتہ داروں سے اچھی طرح پیش آئیے اور یہی دین اسلام کا مزاج بھی ہے۔

کسی کو احساس کمتری کا شکار نہ ہونے دیجیے اور جوڑنے کا کام کیجیے نہ کہ توڑنے کا۔ اس دنیا میں اکیلے تو کسی نے رہنا نہیں پھر کیوں ہم توڑنے کا کام کریں؟ آج ہم ایسا کریں گے تو کل ضرور ہمیں اس کا جواب اور حساب دینا ہوگا۔

اللہ تعالی ہمیں رشتوں کی اہمیت کو سمجھنے اور رشتے جوڑنے کی توفیق دے۔ اللہ ہم مسلمانوں کو ایک جسم کی طرح متحد بنائے۔ رب قدیر اپنے نبی، ان کی ازواج اور صحابۂ کرام کے درمیان قائم ہونے والے پیارے رشتوں کے صدقے ہمیں جوڑنے والوں کی صف میں رکھے اور توڑنے کے گناہ سے بچائے۔

دختر ملت

(رکن عبد مصطفی آفیشل)