Ek Aurat Hazrate Umar Bin Khattab Radiallaho Ta'ala Anho Ke Paas Aayi Aur Arz Ki :
Aye Ameerul Momineen! Mera Khawind (Husband) Din Ko Roza Rakhta Hai, Raat Ko Qiyaam Karta Hai Aur Main Us Ki Shikayat Karna Bhi Napasand Karti Hoon, Wo Allah Ki Ita'at Mein Rehta Hai
Hazrate Umar Ne Us Se Kaha Ke Tera Khawind Bahut Achha Hai
Wo Aurat Baar Baar Apni Baat Duhrati Aur Hazrate Umar Yahi Jawab Dete Rahe
Hazrate Kaab Asadi Radiallaho Ta'ala Anho Ne Hazrate Umar Se Kaha : Aye Ameerul Momineen! Ye Aurat Apne Khawind Ki Shikayat Kar Rahi Hai Ke Wo Is Se Humbistar Nahin Hota!
Hazrate Umar Ne Kaha : Jaisa Ke Tum Ne Is Ki Baat Samjhi Hai Pas Faisla Bhi Tum Hi Karo
Hazrate Kaab Ne Farmaya : Is Aurat Ke Khawind Ko Mere Paas Laaya Jaaye, Use Laaya Gaya To Hazrate Kaab Ne Us Se Kaha Ke Teri Biwi Teri Shikayat Karti Hai
Khawind Ne Kaha : Khane Ke Baare Mein Ya Peene Ke Baare Mein?
Hazrate Kaab Ne Kaha : Nahin (Khane Peene Ki Baat Nahin Hai) Phir Aurat Ne Ash'aar Padhe Jis Ka Mafhoom Ye Hai Ke Aye Qaazi! Is Ki Danish Badi Pukhta Hai, Mere Dost Ko Us Ki Masjid Ne Mere Bistar Se Ghafil Kar Diya Hai, Us Ki Ibadat Ne Mere Pahlu Mein Sone Se Adame Dilchaspi Paida Kar Di Hai, Aye Kaab! Faisla Karo Aur Taraddud Ka Shikar Na Ho, Ye Na Din Ko Sota Hai Aur Na Raat Ko Sota Hai, Aurato Ke Mamlaat Mein Main Is Ki Tareef Nahin Karti
Jawaban Khawind Ne Kaha : Is Ke Bistar Aur Is Ke Hajla -e- Aroosi Se Mujhe Dilchaspi Nahin Hai, Main Aisa Shakhs Hoon Ke Jo Suratun Nahl, Suratul Baqarah, Aale Imran, An Nisa, Al Maida, Al Anaam Aur Al Araaf Mein Naazil Hua Hai, Us Ne Mujhe Har Cheez Se Ghafil Kar Diya Hai, Allah Ki Kitab Mein Bahut Bada Khauf Dilaya Gaya Hai
Hazrate Kaab Ne Farmaya : Aye Shakhs! Tujh Par Apni Biwi Ka Haque Hai, Har Aqalmand Ke Liye Chaar Dino Mein Us Ka Hissa Hai, Use Apna Haque Ada Kar Aur Illatein Bayaan Karna Chhod De
Allah Ta'ala Ne Tere Liye Aurato Mein Se Do Do, Teen Teen Aur Chaar Chaar Halaal Ki Hain, Tere Liye Teen Din Teen Raatein Hain To Un Mein Allah Ki Ibadat Kar
Hazrate Umar Ne Farmaya : Allah Ki Qasam! Main Nahin Jaanta Ke Main Tere Kis Amr Par Tajjub Karoon, In Ke Mamle Ko Samajhne Par Ya Tere Faisle Par, Tum Jaao Maine Tumhein Basra Ka Qaazi Banaya
(الجامع الاحکام القرآن معروف بہ تفسیر قرطبی، اردو، ج3، ص41)
Jin Ki Biwi Ya Biwiya'n Hain, Un Ke Liye Ye Jaayez Nahin Ke Un Ke Bistar Ko Chhod Kar Kahin Aur Mashghool Ho Jaayein Agarche Wo Ibadat Hi Kyun Na Ho!
Ibadat Bhi Karein, Tijarat Bhi Karein Lekin Saath Hi Saath Apni Biwi Ke Huqooq Ka Bhi Khayaal Rakhein
Zindagi Mein Paisa Hi Sab Kuchh Nahin Hota, Jis Aurat Ne Apni Zibdagi Aap Ke Qadmo Mein Rakh Di Hai Use Chhod Kar Saalo Pardes Mein Rehna Aur Illatein Bayaan Karna Durust Nahin Hai
Agar Paiso Se Itni Muhabbat Thi To Kisi Ki Zindagi Ko Beech Mein Nahin Laana Chahiye Tha
Abde Mustafa
Post a Comment
Leave Your Precious Comment Here