Motivation Aur Inspiration Kahan Hai?

Motivation Aur Inspiration Kahan Hai? 

Kisi Ko Dekh Kar Kuchh Kar Dikhane Ka Hausla Paida Karna, Chand Jumlo (Sentences) Se Bada Sabaq Haasil Kar Lena, Kaamyab Logon (Successful Peoples) Ko Dekh Kar Mutaasir Ho Jaana Aur Phir Apne Aap Par Bharosa Kar Ke Apni Qabiliyat Ko Baahar Laana, Yahi Hai Motivation Aur Inspiration Ki Dunya Jahan Pahunchne Ke Baad Insan Ke Andar Ek Ajeeb Inqilab Bapa Hota Hai

Hum Motivate Hone Ke Liye, Khud Ko Targheeb Dene Ke Liye, Inspire (Mutaasir) Hone Ke Liye Aur Apne Andar Jiddo Jahad Ka Jazba Paida Karne Ke Liye Kahan Jaayein? Kya Motivational Bayaan Dene Waale (Motivational Speakers) Ko Sunein Jaisa Ke Karodo Naujawan Sunte Hain Ya Kuchh Aur Karein? 

Muslim Naujawano Ko Hum Batana Pasand Karenge Ke Un Ko Motivation Aur Inspiration Ke Liye Kahin Jaane Ya Kisi Ko Sunne Ki Zaroorat Nahin Hai Balki Apne Deen Ko Padhne Aur Samajhne Ki Zaroorat Hai, Isi Mein Motivation Aur Inspiration Ki Ek Aisi Dunya Hai Jo Shayad Aap Ko Kahin Aur Dekhne Ko Na Mile 

Humari Ye Baat Aap Ko Thodi Ajeeb Lag Sakti Hai Ke Deen Mein Motivation Aur Inspiration Kahan Se Aa Gaya To Hum Aap Ko Is Ki Ek Jhalak Dikha Hi Dete Hain 

Ek Shakhs Ko Aaj Poori Dunya Imam -e- Aazam Ke Naam Se Yaad Karti Hai Aur Karodo Log Un Ki Taqleed Karte Hain, Kya Ye Baat Aap Ko Inspire (Mutaasir) Nahin Karti? 

Sirf 17 Saal Ki Umr Mein Imam Malik Hadees Ka Dars Dete The, Kya Ye Baat Aap Ko Motivate Nahin Karti? 

Imam Ibne Jauzi Ne Zamana -e- Talibe Ilmi (Student Life) Mein 20,000 Kitabein Padhi

Madrase Ki Poori Library Ki 6,000 Kitabein Padh Daali, Phir Baghdad Ke Kutub Khano (Libraries) Ki Tamam Kitabo Ka Mutala Kar Liya, Kya Ye Sun Kar Aap Ko Inspiration Nahin Milti? 

Muhaddise Aazam Pakistan Bijli Na Hone Ki Wajah Se Raat Ko 12-1 Baje Tak Municipal Committee) Ke Lamp Ke Neeche Khade Ho Kar Apna Sabaq Yaad Karte The, Kya Is Se Inspiration Nahin Milti? 

Imam Abu Yusuf Ke Bete Ka Inteqal Ho Gaya, Ek Taraf Janaza Hai Aur Dusri Taraf Ilme Deen Padhne Ke Liye Ustad Ke Paas Jaana Hai, Aise Mein Hum Kya Karte Lekin Imam Abu Yusuf Ne Ek Shakhs Ko Bete Ko Dafan Karne Ki Zimmedari Di Aur Ilm Seekhne Chale Gaye! Ye Sun Kar Bhi Aap Motivate Nahin Huye? 

Apne Deen Ko Padhein, Kisi Ne Bachpan Mein Mukammal Quraan Hifz Kar Liya, 

Kisi Ne 12 Saal Ki Umr Mein Fatwa Jaari Kiya, 

Kisi Ne 1000 Kitabein Likh Daali, 

Kisi Ne Ghar Bech Kar Kitabein Khareed Li, 

Kisi Ne Saalo Qaid Rehna Gawara Kiya Lekin Haque Ka Saath Na Chhoda,

Saikdo Ne Laakho Ko Shikast De Di......., 

Aur Bhi Bahut Kuchh Hai Jo Aap Ko Aisa Inspire Karega Ke Zindagi Bhar Kisi Ghair Se Motivation Aur Inspiration Nahin Leni Padegi Bas Apne Deen Ko Padh Kar Dekhein

Abde Mustafa