Aalim Aur Ishq

 Aalim Aur Ishq

Allama Ibne Jauzi Likhte Hai Ki Bagdad Ka Ek Bahut Bada Aalim Apne Talaba Ke Saath Hajj Ke Safar Rawana Hua, Daurane Safar Paani Na Milne Ki Wajah Se Sab Nidhal Ho Kar Ek Girja Ghar Ke Saaye Me Aaram Karne Lage, Talba Saaye Tale So Gaye Lekin Ustad Paani Ki Talash Me Nikal Pade,

Paani Ki Talash Me Ghoom Rahe The Ki Ek Eisayi Ladki Par Nazar Padi Jo Chamakte Hue Suraj Ki Tarah Khoobsurat Thi Ab Paani Ko Bhul Kar Ustad Sahab Usi Ki Fikr Me Lag Gaye Phir Us Ladki Ke Ghar Pahuch Kar Us Ke Baap Se Baat Ki To Us Me Kaha Ki Agar Tum Humara Deen Qubul Kar Lo To Hi Kuch Ho Sakta Hai,

Ustad Sahab Ne Nasraniyat Ko Qubool Kar Liya, Idhar Talba Abhi So Rahe The,

Phir Saadi Ke Liye Maher Ki Baat Aayi To Ladki Ne Kaha Ki Tum Un Khinziro Ko Ek Saal Charao To Yahi Mera Maher Hoga, Ustad Sahab Ne Kaha Ki Thik Hai Lekin Meri Ek Shart Hai Ki Ek Saal Tak Tum Apna Chehra Mujh Se Nahi Chupaogi, Ladki Boli Ki Manzoor Hai, Ustad Sahab Ne Khutba Dene Wala Asaa Uthaya Aur Khinzir Ko Charane Nikal Pade!

Jab Talba Jage To Ye Sab Janne Ke Baad Neend Ke Saath Un Ke Hosh Bhi Udd Gaye, Phir Woh Ustad Sahab Se Milne Gaye To Dekha Ki Woh Khinzeero Ko Idhar Udhar Jane Se Rok Rahe Hai, Talba Ne Ustad Sahab Ko Qur'ane Paak, Islam Aur Nabi -E- Kareem Ke Fazail Yaad Dilaye To Us Ne Kaha Ki Mujh Se Door Ho Jao, Main Ye Sab Tum Se Zyada Janta Hu, Aakhir Kaar Talaba Mayoos Ho Kar Safar -e- Hajj Par Rawana Ho Gaye.

Hajj Ada Karne Ke Baad Wapasi Par Usi Makam Par Pahuche To Phir Ustad Sahab Ki Halat Dekhne Gaye Ki Shayad Tauba Kar Li Ho Lekin Use Usi Haalat Me Paya

Talba Ne Nasihat Ki Lekin Koi Faida Nahi Hua, Ek Baar Phir Woh Hasrat Zada Dil Liye Wapas Ho Liye

Jab Talba Thodi Door Nikal Gaye To Unhone Dekha Ke Piche Koi Shakhs Chikh Chikh Kar Unhe Rok Raha Hai, Jab Woh Qareeb Aaya To Maloom Hua Ke Woh Koi Aur Nahi Balki Ustad Sahab The, Ustad Sahab Ne Kaha Ki Main Gawahi Deta Hu Ki Allah Ke Siwa Koi Mabood Nahi Aur Hazrat Muhammad Allah Ke Rasool Hai, Ye Aazmaish Thi Jis Se Main Nikal Gaya

Ek Din Talba Ustaad Sahab Ke Ghar Par The Ki Ek Aurat Ne Darwaze Par Dastak Di, Poocha Gaya To Kahne Lagi Ji Mujhe Shaikh Se Milna Hai, Shaikh Se Kaho Ki Fulan Raahib Ki Beti Islam Qubool Karne Aayi Hai Fir Woh Andar Daakhil Hui Aur Boli :

Aye Mere Sardar! Aap Ke Haath Me Musalman Hone Aayi Hu. Jab Aap Chale Gaye To Maine Ek Khwaab Dekha Jis Mein Hazrate Ali Bin Abi Talib Radi Allahu Ta'Ala Anhu Ki Ziyarat Hui, Unhone Farmaya Ki Deen -E- Muhammadi Ke Alawa Koi Deen Saccha Nahin Fir Farmaaya Ki Allaah Ta'Ala Ne Tere Zariye Ek Bande Ko Aazmaaya Hai Chunanche Ab Mai Aap Ke Pass Aa Gayi Hu.

Islaam Qubool Karne Ke Baad Shaikh Ne Un Se Nikaah Kar Liya.

(انظر: بحر الدموع اردو، ص128، ملخصاً) 

Is Waaqiye Mein Kai Asbaaq Hain Lekin Aik Bada Sabaq Ye Hai Ki Jab Kisi Ko Kisi Se Ishq Ho Jaaye To Use Paane Ke Liye Hadd Se Aage Na Badhe, Agar Hadd Ke Andar Rah Kar Haasil Na Kar Paaye Fir Sabr Kare Aur Apne Rab Se Bahtari Ki Ummeed Rakhe

Be Shak Allaah Ta'Ala Ke Liye Ye Namumkin Nahin Ki Kisi Ke Dil Ko Pher De, Agar Aap Apni Chahat Mein Mukhlis Hain To Allah Ke Fazl Se Koi Na Koi Rasta Zarur Dikhayi Dega

Abde Mustafa