Tumhare Paas Tumhara Nabi Hai

 Tumhare Paas Tumhara Nabi Hai

Jange Hunain Ke Baad Jo Maale Ganimat Hasil Hua Use Huzur ﷺ Ne Tulaqa (Jinhe Fathe Makka Ke Din Huzur ﷺ Ne Muaaf Kiya Tha) Aur Muhaajireen Me Taqseem Farma Diya Aur Ansaar Ko Kuch Na Diya

Is Par Ansaar Ko Ranj Hua Aur In Me Se Baaz Kahne Lage : "Khuda Rasoolullah ﷺ Ko Muaaf Kare, Woh Quraish Ko Ata Farmate Hai Aur Hum Ko Maheroom Rakhte Hai Halanki Humari Talwaro Se Quraish Ke Khoon Ke Katre Tapakte Hai Aur Baaz Bole : "Jab Mushkil Pesh Aati Hai To Hume Bulaya Jata Hai Aur Ganimat Auro Ko Di Jati Hai" 

Huzur ﷺ Ne Ye Charcha Suna To Ansaar Ko Talab Farmaya

Ek Chamde Ka Khema Nasb Kiya Jis Me Aap Ne Ansaar Ke Siwa Kisi Aur Ko Na Rahene Diya.

Jab Ansaar Jama Ho Gaye To Aap Ne Pucha Ki "Woh Kya Baat Hai Jo Tumhari Nisbat Mere Kaano Me Pahuchi Hai?"

Ansaar Jhut Na Bola Karte The Kahne Lage Ke Sach Hai Jo Aap Ne Suna Magar Hum Me Se Kisi Dana Ne Aisa Nahi Kaha Balki Nau Khez Jawano Ne Aisa Kaha Tha

Ye Sun Kar Aap Ne Hamdo Sana Ke Baad Yun Khitaab Farmaya :

Aye Girohe Ansar! Kya Ye Sach Nahi Ke Tum Gumrah The, Khuda Ne Mere Zariye Se Tum Ko Hidayat Di Aur Tum Paraaganda (Bikhre) The, Khuda Ne Mere Zariye Tum Ko Jama Kar Diya Aur Tum Muflis The, Khuda Ne Mere Zariye Se Tum Ko Daulat Mand Kar Diya

Aap Ye Farmate Jate The Aur Ansaar Har Fukre Par Kahete Jate The Ki "Khuda Aur Rasool Ka Ahesaan Is Se Badh Kar Hai" 

Aap Ne Farmaya Ki Tum Mujhe Jawab Kyu Nahi Dete? Ansaar Ne Arz Kiya Ya Rasoolallah ﷺ Hum Kya Jawab De Khuda Aur Rasool ﷺ Ka Ahesan Aur Fazl Hai

Aap Ne Farmaya : Ba Khuda! Agar Tum Chaho To Ye Jawab Do Main Saath Saath Tumhari Tasdiq Karta Jauga : 

Aap Humare Paas Is Haal Me Aaye Ki Logo Ne Aap Ki Takzib Ki Thi, Hum Ne Aap Ki Tasdiq Ki, Logo Ne Aap Ka Saath Chod Diya Tha, Hum Ne Aap Ki Madad (Khidmat) Ki, Logo Ne Aap Ko Makka se Nikal Diya Tha Aur Hum Ne Aap Ko Panah Di, Aap Muflis The Hum Ne Jaano Maal Se Aap Ki Humdardi Ki.

Phir Farmaya Ki Maine Taalife Qulub (Yani Logo Ke Dilo Ko Maa'il Karne) Ke Liye Ahle Makka Ke Saath Ye Suluk Kiya Hai

Aye Ansaar! Kya Tumhe Ye Pasand Nahi Ki Log Unth, Bakriyan (Ganimat Ka Maal) Le Kar Jaye Aur Tum Rasoolullah ﷺ Ko Le Kar Ghar Jao

Allah Ki Qasam! Tum Jo Kuch Le Ja Rahe Ho Woh Is Se Behtar Hai Jo Woh Le Ja Rahe Hai Agar Log Kisi Wadi Ya Darre Me Chale To Main Ansaar Ki Wadi Ya Darre Me Jaunga

Ye Sun Kar Ansar Pukar Uthe : 

Ya Rasoolullah ﷺ Hum Raazi Hain,

Un Par Is Qadar Riqqat Tari Hui Ki Rote Rote Daadhiya Tar Ho Gayi

(علامہ نور بخش توکلی، سیرت رسول عربی، ص236)

Thoda Sa Male Ganimat Kya Hai, Agar Ek Taraf Puri Duniya Aur Us Ki Daulat Maujood Ho Aur Dusri Taraf Huzur ﷺ Ho To Ye Faisla Karne Me Koi Dushwari Nahi Hongi Ki Hume Kidhar Jana Hai

Abde Mustafa