Jumuah Aur QR Code

 

Jumuah Aur Qr Code 

Zara Sochein Ke Aap Kisi Masjid Mein Jumuah Ki Namaz Padhne Gaye Aur Imam Saahib Ne Daurane Taqreer Ye Kaha Ke Aap Log Yahan Se Jaate Waqt Baahar Laga Qr Code Scan Kar Ke Humara Whatsapp Group Join Kar Lein Taaki Humari Bheji Hui Deeni Malumaat Se Aap Rozana Kuchh Na Kuchh Seekh Sakein...! Ye Sun Kar Aapko Kaisa Lagega? Kya Aapko Aisa Mahsoos Nahin Hoga Ke Ab Humari Qaum Ka Deeni Tabqa Taraqqi Kar Raha Hai? Kya Aapko Aisa Nahin Lagega Ke Hum Zamane Ke Saath Badal Rahe Hain Aur Technology Ka Istemal Kar Rahe Hain? Lekin Ab Taswwur Ki Dunya Se Baahar Aayein Aur Dekhein Ke Kis Qadar Naazuk Halaat Hain

Ye To Sirf Ek Baat Thi, Aisi Hi Kai Baatein Hain Maslan Masjid Mein Badi Screen Lagi Ho Jis Par Kitabo Ki Ibaraat Waghaira Dikha Kar Taqreer Ki Jaaye, Bayaan Ke Dauraan Imam Saahib Ek Motivational Speaker Ki Tarah Idhar Udhar Chalein, Balki Ek Rasta Bana Diya Jaaye Unke Chalne Ke Liye, Mic Advance Ho Aur Speakers Digital Ho Ke Jisse Bolne Aur Sunne Waale Ko Lutf Aaye, Jo Qaum 3gp Aur Hall Recording Film Nahin Dekhti Aap Unhein Agar Jadeed Taqazo Ke Mutabiq Mawaad (Content) Faraham Nahin Karenge To Kaam Nahin Ho Payega, Aap Un Tak Nahin Pahunch Payenge, Phir Sochein Ke Masjid Mein Chanda Dene Ke Liye Online Intezam Ho Yaani Swiping Machine Se Le Kar Online Payments Ke Tamam Options Ho, Ek Box Ho Ke Jis Mein Log Apne Sawalaat, Sujhaao Aur Shikayatein Likh Kar Daal Sakein Phir Jo Sawalaat Aayein Un Par Jumuah Mein Bayaan Kiya Jaaye Aur Poori Tafseel Se Masail Samjhaye Jaayein

Kaash Ke Humare Ulama Apne Aap Ko Badlein, Kuchh Naya Sochein, Kuchh Bada Sochein, Riwayati Tariqo Se Hat Kar Kaam Karein, Agar Nahin Karenge To Pichhe Hote Jayenge, Aap Ek Mobile Khareedne Jayenge To Kaunsa Khareedenge? Kya Aap Aisa Mobile Lenge Ke Jis Mein Nai Cheezein Na Chalti Ho? Kya Us Company Ka Mobile Lenge Ke Jisne Waqt Ke Saath Khud Ko Nahin Badla (Update Nahin Kiya) Aur Wahi Riwayati Kaam Karte Rahe? Nahin, Aap Use Lena Chahenge Jo Zyada Chal Raha Ho, Jiska Trend Ho, Jis Mein Jadeed Sahuliyaat Ho To Theek Isi Tarah Ab Deen Ka Kaam Karne Waalo Ko Bhi Khud Ko Update Karna Hoga Warna Aapka Version Purana Hota Chala Jayega Aur Log Aapse Door Hote Chale Jayenge Lihaza Khud Ko Badlein, Naya Sochein, Bada Sochein, Hat Kar Sochein Aur Agar Aisa Nahin Karna Chahte, Jo Jaise Chal Raha Hai Use Waise Hi Ghaseetna Chahte Hain To Phir Lage Rahiye, Allah Usi Mein Khair Se Nawaze

Abde Mustafa Official