Aaj Fatima Chadar Hata Degi - Ek Riwayat

 

Aaj Fatima Chadar Hata Degi - 

Ek Riwayat

Ek Lambi Riwayat Hai Jis Ka Naam Maine "Bees Minute Wali Riwayat" Rakha Hai Kyun Ke Ise Bayan Karne Waale Humare Muqarrireen Taqreeban Itna Waqt To Le Lete Hain. Agar Jumuah Ke Din Is Riwayat Ko Shuru Kar Diya To Poora Waqt Guzar Jata Hai. Humare Hindustan Ke Beshtar Ilaqon Mein 1 Baje Se Taqreer Shuru Hoti Hai Aur 1:30 Baje Jama'at Ka Waqt Rakha Jata Hai To Is Riwayat Ko Bayan Karne Ka Matlab Hai Ke 20-25 Minute Tak Riwayat Ko Bayan Karne Mein Laga Do Baaqi Chanda Aur Ailanaat Waghaira Mila Kar Poora Jumuah Khatm...!

Ab Main Ise Mukhtasar Kar Ke Likhne Ki Koshish Karta Hoon.

Waqiya Kuch Yoon Bataya Jata Hai Ke Ek Martaba Jibreel Alaihissalam Humare Nabi ﷺ Ko Jannat Aur Jahannam Ke Bare Mein Bata Rahe The Ke Unhone Kaha Maine Fulaan Fulaan Nabi Ki Ummat Ko Jahannam Mein Dekha, Is Par Humare Nabi ﷺ Ne Farmaya Ke Aye Jibreel! Kya Tu Ne Meri Ummat Ko Bhi Jahannam Mein Dekha? Hazrate Jibreel Khamosh Ho Gaye Phir Do Teen Baar Irshad Hone Par Arz Kiya Ke Haan Ya Rasoolallah ﷺ! Main Ne Aap Ki Ummat Ko Bhi Jahannam Mein Dekha! Ye Sun Kar Humare Nabi ﷺ Beqarar Ho Gaye Aur Jungle Ki Taraf Tashreef Le Gaye. Masjid Mein Namaz Ke Waqt Bhi Wapas Nahin Aaye To Sahaba -e- Kiraam Ne Talash Shuru Ki, Poore Teen Din Tak Aap Nahin Mile! Is Ke Baad Maloom Karte Karte Ek Charwahe Se Pata Chala Ke Woh Kisi Ghaar Mein Hain. Yahan Is Tarah Bhi Bayan Kiya Jata Hai Ke Charwahe Se Poocha Gaya Ke Kya Tu Ne Humare Nabi ﷺ Ko Dekha Hai To Woh Kahta Hai Ke Main To Nahin Janta Ke Tumhara Nabi Kon Hai Lekin Fulaan Ghaar Mein Koi Ro Raha Hai Ke Jis Ke Rone Ki Awaaz Sun Kar Meri Bakriyon Ne Khana Chhodh Diya Hai. Ye Sun Kar Sahaba -e- Kiraam Ghaar Ke Paas Gaye Aur Nabi ﷺ Se Guzarish Ki Lekin Aap ﷺ Ne Bahar Aane Se Mana Kar Diya Aur Farmaya Ke Tum Log Chale Jao, Main Us Waqt Tak Ro Ro Kar Duaein Karta Rahunga Jab Tak Allaah Ta'Ala Mujhse Meri Ummat Ko Bakhshne Ka Wada Nahin Kar Leta. Sahaba -e- Kiraam Ne Mashwara Kiya Ke Hazrate Fatima Ko Yahan Par Bulaya Jaaye, Un Ke Kahne Se Aap ﷺ Bahar Aa Jaayenge Chunanche Hazrate Fatima Ko Bulaya Gaya, Aap Ne Aakar Kaha Ke Baba Jaan Agar Aap Aaj Bahar Nahin Aayenge To Fatima Apni Chadar Sar Se Hata Degi Aur Aaj Aasman Wo Dekhega Jo Us Ne Aaj Tak Nahin Dekha. Ye Jumla Jaise Hi Ada Hua To Allaah Ta'ala Ne Hazrate Jibreel Ko Hukm Diya Ke Fauran Jaao Aur Mere Nabi Se Kah Do Ke Unki Ummat Ko Bakhsh Diya Gaya Hai Aur Wo Bahar Aa Jaayein Warna Agar Fatima Ne Chadar Hata Di To Ghazab Ho Jaye Ga. Is Ke Baad Jibreele Ameen Ne Aakar Khush Khabri Di Phir Humare Nabi ﷺ Bahar Tashreef Laaye.

Is Mein Aur Bhi Kayi Baatein Bayan Ki Jati Hain. Har Muqarrir Ka Apna Apna Andaz Hai Rangeen Banane Ka.

Ye Riwayat Kisi Muatbar Kitaab Mein Nahin Milti. Ye Riwayat Khud Bata Rahi Hai Keh Aisi Koi Riwayat Hai Hi Nahin.

Imame Ahle Sunnat, Aala Hazrat Rahimahullahu Ta'ala Likhte Hain :

Ye Batil Aur Be Asal Hai, Kisi Motabar Kitab Mein Is Ka Naam Nishan Nahin

(دیکھیں: فتاوی رضویہ، ج29، ص329 تا 333، ط رضا فاؤنڈیشن لاہور)

Hazrate Fatima Ke Bare Mein Mazkoora Jumle Bhala Kaise Tasleem Kiye Ja Sakte Hain? Phir Ye Ke Musalsal Teen Dinon Tak Ghayab Rehna Aur Kisi Ko Pata Na Chalna Bahut Bayeed Hai. Jo Aisi Riwayaat Bayan Karte Hain Unhein Khauf Khana Chaiye Ke Wo Kya Karte Hain. Kya Wo Is Ka Saboot De Sakte Hain, Nahin De Sakte, Phir Kyun Aisi Be Asal Riwayaat Ko Bayan Karte Hain! Hum Awame Ahle Sunnat Se Ab Guzarish Karte Hain Ke Aise Muqarrireen Se Suwaal Karein Aur Daleel Talab Karein. Humare Muqable Mein Badmazhab Bukhari Muslim Kar Kar Ke Logon Ko Gumrah Kar Rahe Hain Aur Humare Mimbaron Se Aisi Riwayaat Bayan Ki Ja Rahi Hain, Kitne Afsos Ki Baat Hai. Ab Humein Chahiye Ke Aisi Riwayaat Ki Nishan Dehi Karein Aur Bayan Karne Walon Ko Pakadna Shuru Karein.

Abde Mustafa 

Muhammad Sabir Qadri