Kya Pdf Free Mein Ban Jaati Hai?

 

Kya Pdf Free Mein Ban Jaati Hai?

Kai Logon Ko Lagta Hai Ke Kitabo Ki Soft Copies Bilkul Muft Mein Tayyar Ho Jaati Hain Lekin Aisa Bilkul Nahin Hain, Ek Tarah Se Dekha Jaaye To Hard Copy Chhapwane Se Zyada Kharch Soft Copy Mein Aata Hai, Chaliye Aaj Ek Kitab Ki Pdf Ka Kharch Jod Lete Hain 

Haal Hi Mein Humne Ek Kitab "Seerate Mustafa" Shaya Ki, Jis Mein Qareeb 750 Safahaat (Pages) Hain, Ab Aaiye Dekhte Hain Ke Shuru Se Le Kar Final Pdf Tayyar Hone Tak Kahan Kahan Kitne Paise Lagte Hain

Sabse Pehle Kitab Ki Typing Hoti Hai, Ek Shakhs Rozana 5-6 Ghante Likhe To 20-25 Pages Type Hote Hain Yaani 750 Pages Type Karne Ke Liye Ek Shakhs Ko Poore Mahine Rozana 5-6 Ghante Type Karna Hoga Aur Ye Kisi Aise Shakhs Se Karwana Hoga Jo Achhi Typing Karta Ho, Agar Kisi Aise Shakhs Se Karwayein Jo Jaldbazi Mein Kam Paiso Mein Kar Ke Nikal Jaaye To Hoga Ye Ke Typing Mein Bahut Zyada Ghalatiya Hongi Jinki Proof Reading Bahut Bhaari Padegi Aur Uske Baad Bhi Kaafi Ghalatiya Baaqi Reh Jayengi

Ab Kisi Achhe Padhe Likhe Shakhs Se Typing Karwane Ke Liye Use Agar 20₹ Per Page Dete Hain To Sirf Typing Ke 15000 Ho Jaate Hain, Ab Chaliye Aage Badhte Hain

Typing Ke Baad Ab Baari Aati Hai Use Kitabi Shakl Mein Dhaalne Ki Yaani Composing Ki, Ab Iske Liye Bhi Kam Se Kam 20₹ Per Page Ke Hisab Se Jodein To 15000 Iske Hote Hain Yaani Total 30,000 Ho Gaye

Iske Baad Baari Aati Hai Cover Designing Ki Aur Phir 3d Look, Promotion Ke Liye Darjano Social Media Posts Ka Kharch 5000₹ Ke Qareeb Jaata Hai Jiska Aadha Hi Jodein To Total 32500 Ho Gaye

Ye Kharch Jo Humne Bataya Wo Kaafi Riayat Ke Saath Hai Warna Ye Kaam Aise Hain Ke Isse Zyada Paise Lagte Hain

Ab Bhi Agar Aapko Ye Zyada Lagta Hai To Ise Aadha Kar Lein Aur Us Mein Bhi Hazaar Se Zyada Ghata Dein To Bhi 15000 Hote Hain, Ab Batayein Ke Ek Pdf File Jo Aapko Lagta Hai Ke Free Mein Ban Gai Us Mein Kam Se Kam 15 Hazaar Ka Kharch Aaya Hai

Ab Is Tarah Jitni Kitabein Shaya Ki Ja Rahi Hain Un Sab Ka Kharch Joda Jaaye To Bila Mubalgha Laakho Rupay Ka Kaam Ho Raha Hai Lekin Ahle Sunnat Ki Awaam Ko Lagta Hai Ke Koi Chakki Hai Jahan Hum Ja Kar Kehte Hain "Chakki Chakki Pdf Nikaal" To Wo Pdf Bana Kar De Deti Hai, Agar Aisi Chakki Bhi Hoti To Use Bhi Khareedne Mein Paise Kharch Hote

Abhi Gyarahwi Shareef Ka Mahina Hai, Jalse Aur Fatiha Waghaira Ke Naam Par To Laakho Kharch Kar Denge Lekin Jab Baat Aati Hai Kitabo Ke Liye Paise Nikalne Ki To 50-100 Hi Nazar Aate Hain

Itna Jaan Lein Ke Awaam Se Le Kar Khawaas Tak Agar Tabdeeli Chahte Hain To Kitabo Ke Bina Mumkin Nahin, Aap Jalse Juloos Karwate Rahein Jaise Ek Arse Se Karwa Rahe Hain, Koi Khaas Faida Nahin Hone Waala, Agar Waqai Ilm Ki Isha'At Maqsad Hai To Kitabo Ka Daaman Thaam Lijiye, Isse Jahalat Ko Door Kiya Ja Sakta Hai, Afkaar Badle Ja Sakte Hain, Zehan Mein Tabdeeli Laayi Ja Sakti Hai Aur Ek Inqelab Aa Sakta Hai Lekin Iske Liye Aapko Apne Maal Ki Ahmiyat Samajhni Hogi, Use Sahih Jagah Lagana Hoga Warna Laakho Rupay Kharch To Honge Par Natija Hazaaro Waala Bhi Nahin Milega

Allah Ta'Ala Awaame Ahle Sunnat Ko Samajhne Ki Taufiq Ata Farmaye

Abde Mustafa