Mayke Se Padhai, Natije Mein Talaq

 

Mayke Se Padhai, Natije Mein Talaq

Social Media Par Ye Jumla Kaafi Dekhne Ko Milta Hai Ke Jo Ladkiya Shadi Ke Baad Mayke Se Padhai Karti Hain Unko Natije (Result) Mein Talaq Ki Degree Milti Hai

Ye Baat Sahih Hai Ke Agar Ek Ladki Shadi Ke Baad Apne Sasuraal Mein Apne Shauhar Aur Apne Sasuraal Waale Jo Ke Uske Ghar Waale Hain, Unke Mutabiq Khud Ko Dhaal Kar Chalne Ke Bajaye Apne Mayke Waalo Se Padhegi Yaani Wo Jo Kahenge Use Apne Liye Harfe Aakhir Samjhegi Aur Sasuraal Waalo Se Mukhalifat Karegi Aur Unhein Dushman Jaanegi To Phir Masail Hi Masail Honge

Yahan Hota Ye Hai Ke Ladki Ke Mayke Waale Un Halaat Aur Un Tamam Baato Ko Nahin Jaante Jo Sasuraal Mein Hoti Hain Ya Miyan Biwi Ke Darmiyan Ki Hoti Hain Agarche Unhein Kaafi Tafseel Se Bata Bhi Diya Jaaye Phir Bhi Wo Tasweer Ka Ek Rukh Bhi Sahih Se Dekh Nahin Paate Aur Aise Mashware Dete Hain Jo Mazeed Masail Ko Badha Dete Hain, Humare Paas Is Tarah Ke Masail Par Likhne Ke Liye Guzarishaat Aati Rehti Hain Aur Kai Muamlaat Humari Aankho Ke Saamne Hain Jinhein Humne Qareeb Se Dekha Hai

Jahan Miyan Biwi Ko Mil Kar Apna Ghar Sambhalna Chahiye Tha Wahan Kisi Teesre Ka Dakhal Muamla Bigaad Deta Hai 

Miyan Biwi Ke Darmiyan Na Ittefaqi Badhane Aur In Mein Judai Daalne Waalo Par Hadees Mein Lanat Aai Hai Aur Yahan Yahi Ho Raha Hota Hai Lihaza Mayke Waalo Ko Khoob Ghaur Karna Chahiye Ke Wo Kahin Is Lanat Ke Mustahiq To Nahin Ho Rahe? 

Aurato Ko Chahiye Ke Ita'at Karein Aur Mukhalifat Karne Ko Apna Mashghala Na Banayein, Shike Shikayato Ko Humesha Zubaan Par Rakhne Se Parhez Karein, Sabr Aur Tahammul Ke Saath Apne Shauhar Ke Liye Sukoon Ka Baais Banein Warna Aapki Nashukri Aapke Paas Maujood Nemato Ke Zawaal Ka Sabab Ban Sakti Hain

Abde Mustafa