Kaneeze millat aur Instagram ki kahani

Kaneeze millat aur Instagram ki kahani

Ek trend ladkiyo mein ye chala hai ke Instagram par ek aise naam se ID banati hain jinse unke peer ki nisbat zaahir hoti hai maslan Kanize fulaan, Fulaan ki sherni aur Fulaan ki shehzadi waghaira

Aage badhne se pehle hum ek aur haqeeqat aapko batana chahenge ke ladkiyo ke jitne muamlaat abhi samne aa rahe hain in mein sabse zyada Instagram se talluq rakhte hain, Facebook, WhatsApp aur dusre platforms ko Instagram ne in muamlaat mein pichhe chhod rakha hai

Aisi ladkiyo ke saro par Deen ki tableegh ka aisa bhoot sawar hai ke nafa aur nuqsan ka farq bhi samajh nahin aata, Inhein lagta hai ke ye Deen ka kaam kar rahi hain lekin nataij bata rahe hain ke Shikar karne gaye the aur khud shikar ho baithe waale halaat hain

Ladkiyo ki taleem ka silsila aise hi kaafi ghalat chal nikla hai upar se ye mobile aur aise platforms inhein apne bunyadi maqasid se door karte ja rahe hain, Ek ladki ko chahiye ke pehle wo kaam seekhe jo use aage zindagi bhar karna hai, Agar in karne waale kaamo ko aaj nazar andaz karegi to kal us shakhs ke liye masail paida karegi jo uska shauhar banega aur use khaangi fikr se aazad na kar sakegi jo ke ek aurat ka maqsad hona chahiye

Kaam wo karein ke jo aapki tarjeehat mein se hain, Jinhein aapne pehle karna hai, Ghair zaroori ya baad ki cheezo ko pehle la kar asal aur tarjeehat ko tark karna nizaam ko bigaad kar rakh deta hai, Ye bahut ghaur karne waali baatein hain unke liye jo ilm aur faham waale hain

Abde Mustafa